غناوي ست الحزن

أوجاع عربية

كان يا ما كان في وطننا العربي

كان ياما كان

مهداة إلى روح الشهيد  محمد الدرة   ورفاقه  فقط

محمد عبد الرحمن حجازي

كان ياما كان ف وطنا العربي

واحد قربي

كات شغلته يسقينا تاريخنا

كان قسيس وكمان كان شيخنا

وعمر  ما دخنا  وكنا شباب

ومتعرفش إزاي يوم شخنا

يوم ماقرينا ف نعي القربي

شكر ولي العهد التربي

يومها لطمنا بكسر شقافة

والحدافة  ...

حدفت ناحية غيط مش غيطنا

وفرضوا علينا ف حتى عياطنا

دمغة ذل !

ويادي الذل ياوطن إتكسر

ياللي راهنت علينا وتخسر

معلوم تخسر ... لازم تخسر

ماحنا بقينا كمثل ولية

قتلوا راجلها وسرقوا الدية

وكتبوا ف صك وفاته وفاتها

ليها ملف  بألف قضية

وكان ياما كان ف وطنا العربي

* * *

كان فيه شاعر إبن أكابر

مات من قهر الزمن القادر

قال له ياشاطر إوعي تخاطر

إوعي ف كلمة حق تكابر

إوعى ياوالي الأمة تصالح

إوعي تقول الدنيا مصالح

دمنا مش ف البورصه مكانه

سد الوالي بطينه ودانه

وقالوا الشاعر طق جنانه

حاجة تجنن !

م الشحات عارفينه حرامي

بس لقاله ما بينا محامي

رجع لقمة ولقم اللقمة

وقال لصحاب الطبخة يحنن

والفزورة مهيش في الصورة

حشو الصورة كلاب مسعورة

والجرانين عمالة تصور  ....

صورة وصورة وصورة وصورة

لما بقت ملاينهم تورة

مصوا نخاع مريم ووليدها

ودفنوا عيال القدس ف جورة

سرقوا يابابل كحل عنيك

لجل يحلوا النجمة العورة

حلفوا لجولدامائير تصاويها

جوة الكعبة تكون منشورة

والطرابيش والعبي تطاطي

لفعل الواطي

وإللي يهاتي بكرة هينسى

لما الكبسة ف معدته ترسى

تحت هبر مولانا الحاتي

ويادي الذل ياوطن إتكسر

ياللي راهنت علينا وتخسر

معلوم تخسر  .. لازم تخسر

ماحنا بقينا كمثل ولية

قتلوا راجلها وسرقوا الدية

زكتبوا ف صك وفاته وفاتها

ليها ملف بألف قضية

وكان ياما كان ف وطنا العربي

***

الحجاج ياقهاوي البصرة

صدق ف القول

كشف الورق الجي  ... عرفنا

يعني بلغة اللعب  ... كشفنا

قال لزماننا اللعب أصول

لم ولاد اللعب ف كمه

ولجل محدش فيكم خمه

أش زمانكوا وبصر بصرة

فات لزماننا بنات وشيوخ

وعشان لما هنيجي ندوخ

حكم الحكم بكل شموخ

هي رقاب لازم هقطفها

كان يقصدنا ...

بس السيف الأعمى قطفكم

وأما سكتوا كتر خيركم ...

جبتوا  درفها

من دا لحين وغراب البين

حكم إن إحنا نشيل الطين

وإن سب لنا قوام نهتف له

القول قولك  ... ألف أمين

والعداد يا شرف بغداد

عمال بيعد

والملهوفة حيطان الكوفة

أهي بتتهد

لجل عيون النجمة البايرة

ياناسنا السو

صادروا بلادنا عشان تخلي لهم

أرض وجو

ويادي الذل ياوطن إتكسر

ياللي راهنت علينا وتخسر

معلوم تخسر  ... لازم تخسر

ماحنا بقينا كمثل ولية

قتلوا راجلها وسرقوا الدية

وكتبوا ف صك وفاته وفاتها

ليها ملف بألف قضية

وكان ياما كان ف وطنا العربي

* * *

يامو صلاح الدين الأصلي

ياماركة بختم نضيف رباني

جابوا ف الشركة شبيه لوليدك

مليون نسخة  ... ضمان مجاني

بس شبه يشبه لنفوسنا

والتقفيل صيني وتايواني

م الكتالوج العربي إختاري

مدفع خيبة وجيش حماري

وحطي الفيشة ودوسي الزر

كل جيوش أعادينا تفر

شفت المر ...

شفت المر يا ست تاريخنا

فكرنا أصبح فكر أتاري

داري علينا وداري دموعك

د الموضوع أصبح موضوعك

لمي عجزنا زقيدي علينا

ف بير الجاز إللى مغمينا

متخليش لا خروف ولا ديب

لحسن تيجي ف يوم تلاقينا

بلبس الحج ف تل أبيب

يومها هيبقى القدس إتهود

والحاخامات على قبر محمد

وإحنا لسانا عشان متعود

هيقول دا المكتوب ونصيب

ويادي الذل  ياوطن إتكسر

ياللي راهنت علينا وتخسر

معلوم تخسر

لازم تخسر

ماحنا بقينا كمثل ولية

قتلوا راجلها وسرقو الدية

وكتبوا ف صك وفاته وفاتها

ليها ملف بألف قضية

وكان ياما كان ف وطنا العربي

* * *

إمضو ا معايا بلاغ ف الأمة

من أبابيل الله والهمة

أبرهة راجع ياخد تاره

بعد ما داوى الفيل والرمة

تيجوا نجرب نغضب مرة

تيجوا نعيش إحساس الدرة

لما ولاد الكلب إتملوا

وشافوا ف عينه سنينا المرة

صلبوا دموعه ف أوتار صوتنا

حكموا علينا نزامل موتنا

ملكوا الوقت وسرقوا الماضي

وإشتروا بكرة بسعر سكوتنا

وإللي يقدر سعرنا كام

شيخ المنسر أونكل سام

نطلع فالصوا ما نسواش يورو

وإللي يعارض ياخد دوره

إنتي يا أمة بتنسي تشمي

ولا ضميرك عنده زكام

إنتي يا أمة معدش يهمك

إللي يسب لأبوكي وأمك

وإللي بيقطف زهر عيالك

وإللى بينقع سمه ف دمك

يادي الذل

يادي الذل ياوطن إتكسر

ياللي راهنت علينا وتخسر

معلوم تخسر .. لازم تخسر

ماحنا بقينا كمثل ولية

قتلوا راجلها وسرقوا الدية

وكتبوا ف صك وفاته وفاتها

ليها ملف بألف قضية

وكان يا ما كان ف وطنا العربي

المتانيا  في 1/1/2001

محمد عبد الرحمن حجازي

روح يا غريب

روًح يا غريب

روح يا غريب على بلد الحبيب

بكرة جي دورنا والجروح تطيب

سلم ألف مرة على كل دار

والله الغربة مرة والفراق لهيب

***              ***                  ***

أحضن السواقي وأنشر ع الجريد

للأرض الشراقي فستانها الجديد

وإن سألوك علينا وده مش بعيد

قول لسه لنا باقي في التغريبة عيد

ومتنساش تملي للعيال تملي

ياشموسة طلي داللي جي قريب

روح يا غريب

خلي الصبر راية والنصيب ميعاد

غني مع الصبايا وإحلم للولاد

حني كفوف بلدنا من خير الحصاد

علشان لما نرجع نلقى الشوق وزاد

وإتمنى لنا لما نرجع تاني لمة

زيك نلقى ضمة تهون العصيب

روح يا غريب

بوس لينا الأيادي وقولها بأعلى صوت

من بعد السنادي راجعين يالبيوت

داحنا ف عيشة توهة وكل لحظة موت

وأعلى صوت في الغربة أوطى من السكوت

سلم عالبلابل لما تروح تقابل

نسمة المشاتل على جسر النصيب

روح يا غريب

                        محمد عبد الرحمن حجازي

كلام لزوم الختام

كلام لزوم الختام

سرسوب وجع م القلب شر لفوق

زعق الجدع م الغلب شب لتحت

إرتحت لما إتخنق وأنا فاكره كان بيفوق

مزنوق ف قلب الوسع سنى إتسخ م النحت

عضمي إتكشف فتحت ...ريحت لما إرتحت

ورجعت تاني  .....قلوق

وطن المحب ضمير ساكن شطوط البوح

ملضوم ف عقد الشجن م المبتدا بالروح

جايز يكون إتسجن بين لأه  والمسموح

لكنه وعد ووجب وإللي إنكتب بيصير

قبل العسل للصير طعم العنب بيروح

فتل الشواشي حبال يقلق جدور التوت

والعنكبوت رحال بين الحيا والموت

وأنا بين غيطان الدرة طبطبت عالملكوت

ضحك النجيل والقنا من جرأة المخلوق

لساه بيحبي إنما ... سابق خياله الصوت

يا مغرمين بالندا ف الزحمة عالأوهام

سوق إبن آدم ينصبه طمعه في كام وبكام

لو كان ميزانه يعذبه ويجيب لعقله لجام

ماكان لسان المسأله يصرخ يا خلق الله

ليه الغيطان مجبرة  ... تطرح طحين العام

جميز ولاد الشقا شق الهدوم بالعرض

مقبلش توب الشعلقة بقى حشو دود الأرض

والدود ف ضل المشنقة نابه إتبرى م القرض

بقى ديب ولسه بنهمله  مع إنه فوق الضرس

منقوش بسن المهزلة ... نهش الخلايق فرض

                                       محمد عبد الرحمن حجازي

مكتوب

مكتــــــــــــــــــوب

مكتوب لي أكون لك صرخة صوت

تتحدى الصمت بعشق الموت

وأرسم بحدودي حدودك ضل

وألف التل بشجر التوت

**  **  **

مكتوب لي أكون موال موجوع

على ناي العشق يقول يا رجوع

وإن كان اللقا  ف عيونه دموع

أنا بحر الدمع ف عيني يفوت

**   **  **

مكتوب لي أكون جلاد للريح

ولا  إنه يخلي القلب ضريح

م أنا عندي أبات موجوع وجريح

ولا إن الصبح يشله القوت

**  **  **

مكتوب لي أكون مع إنه محال

في زمان الكدب أكون قوال

لكن أهو صوت على قد الحال

أفضل من توهة ف حضن سكوت

 محمد عبد الرحمن حجازي

مسافر لوحدك ؟

مسافر لوحدك ؟     

هذه القصيدة رثاء في رثاء  معلمي الشاعر الكبير والمربي الفاضل الأستاذ /

محمد محمد تمساح

                           وأسألكم الفاتحة ترحما عليه . 

( مسافر لوحدك )

وسافر .....

وسافر يازارع حروف البراءة

ف طهر القصايد

يافارس زمان المعاني إللي ملت

ضجيج الرداوي  وكدب الجرايد

أنا مش بقايض زماننا بزمانك

وعفريت جناني ميحلمش إنه

يبدل عجزنا بصهوة حصانك

ولسايا  معجب بسيف الكرامة

بيلمع في إيدك ف عز الشدايد

* * *

مسافر لوحدك ؟!

مسافر لفين ؟

ياكلمة صريحة مكفاش زماننا

حروفها المريحة

زمانها هزمنا  وداس فوق هواننا

وعدى  حدود السنين الجريحة

وحتى الوداع ...

وحتى الوداع هزمته ف رحيلك

قالولي إن أخر كلامك خدعهم

ونشف دموعهم

ولملم بقايا الأمان بين ضلوعهم

وطيب وجعهم .. وضم الحيطان

وباس نسمة شايلة

سلام الغيطان  ...

ومدد له ساعة مابين الجريد

وبص لبعييييييييد ...

لطيبة أسامة وضحكة سعيد

وصلت جوارحه صلاة الفراق

وعدى إشتياقه حدود الإشتياق

وفاق إللي جنبه

على صوت بينعي

وصوت من بقايا الحروب كان بيدعي

مصدقش نعيه !!

عشان كان ف وعيه وحتى ف خياله

بيحلم تعيش بينا ميت ألف عام

ياضلة سلام

سكن بين ضلوعها هديل الحمام

عليك السلام

يا أول حضور القوافي ف كلامنا

يافارس بحور الغناوي إلي كنا

بنحلم تسابق  جدور النخيل

يالمحة أصيل

خدت م المغارب وجعها الطويل

ونامت ف حضن الكلام الجميل

وصحيت ونامت  ونامت وصحيت

ولسة الحكاوي ف كلامك ما نامت

أقولكش  ... هانت

مسيرنا نروحلك

ونوصل كلامنا ونفضل ف رحلك

ونلضم شتات الحكاوي اليتيمة

حكاية حكاية ف عقد الليالي

نخاوي ( الأغاني ) بشهد ( الأمالي )

ويسمع جارودي  ديوان البارودي

ونستنى تاني ستارة الريحاني

ويمكن نقابل هناك البوصيري

في زحمة ميدان الإمام الحسين

وينقش بريشته مدايحه  ف ضميرنا

ورفعت  بقرا ف سورة ياسين

يأمن  جاهين ... وبيرم يناول

لمحفوظ حكايته  وبخته إللي مايل

وثومة وعبده  خصامهم حكاية

وأصل الحكاية درويش بقربة

بيسقي البخاري ماوردي الأحبة

وبسم المحبة سيد ينادي

بلادي بلادي  يتهز الأزهر

ف عز المظاهرة ب الله أكبر

وم الفجر بدري تقوم أم هاشم

تداوي بدموعها ضحايا العساكر

ولسايا فاكر  عساكر بلدنا

يوضونا مرة  ... يخضونا مرة

ويوم تبقى حلوة

ويوم تبقى مرة

ونقطة نظااااااااااااام ...

ونقطة نظام لروح ف الحديد

منا لسة بشطح

وبجمع وبطرح ف غلة سكاتنا

ومستنى بيتنا تزين سطوحه

بقمحة وشعيرة  ... وتبقى الشعيرة

صلاة الغيطان

وتبقى المؤذن ويعلى الأدان

منلقاش مكاننا ف مولد بلدنا

تمد الخطاوي وتاخد بإيدنا

نمرجح عيالنا ما بين المفارق

ونمسح وشوشهم  ف تيل البيارق

ونشحت هدومهم ف ليلة سبوعهم

من الخالة مريم ومن عم تادرس

ولساك بتحرس ف ليل الديابة

وفي النور مدرس عيال الغلابة

تطبطب عليهم  وتنصح كعادتك

وتكتب بخطك .....

عايز تبقى راجل ؟

أملك إرادتك

وتضحك ونضحك

ولساك بتضحك

ولكن دموعنا إزاي  هتضحك ؟؟؟؟

( رحمة الله عليك )

محمد عبد الرحمن حجازي

كلام لزوم الكلام

كلام لزوم الكلام

مابين السطر والمسطور

حدود البوح بتتملى

في لغز الروح 

ومستورنا  ومقدورنا .. بلا علة  

وتترجى على لساني

  زمان تاني ميشبهش

زمان المغرمين بالصمت

ويا بكرة أنا وشمك على وقتك

ونقشك فوق جدور الصمت

وحلفتك .. 

 بخط النسخ والرقعة

وروح إقرأ وبالواقعة

تحاجي عليا بين إيدك  

ويا بكرة إذا جيتك

بتوب يأسي متنكرنيش

دنا إللي ف حلمي خبيتك

وعديتك من التهميش

متتركنيش بلا داعي

أدور جوة أوجاعي

على لحظة مبتصديش

وصبرني على خطي

وع الخلق إللي بتوطي 

وتدفن صوتها ف سكوتها

وتتحجج بأكل العيش 

محمد عبد الرحمن حجازي

كان

كان

أجمل مافيكي إن النما

طرحه على خدودك براح

وأنا المسافر بين ضلوع الهمهمة

أنقش تفاصيلك صباح

تحضن دفاه ضحكة عروق السوسنة

تفرش لنا الضل المباح

ياهلترى  .... مين حقه يبكي عاللي راح

أنا وإنتي وخدود النما  ... يا هلترى

ولا الجراح

أجمل ما فيكي إن الندى

لما إبتدى يخلق ف حباية الوجود

شاور لقلب المبتدا

طبطب  على حدود الخلود

زاح عن حنايا العشق  .. زيف لون الصدى

رجع لها ... لون حلمها وردي الخدود

ياهلترى  ... ممكن إذا سجن المسافة هدني

يقدر نداك يرمني  ... يا هلترى

ممكن أعود

أجمل مافيكي  إن البريق

جدد صباه من بسمتك  ... ضم السما

لملم بقايا الجرح وإتحدى الطريق

صحصح موات الطرح من لحظة  وما

دندن على شط الوداع قب الغريق

كسر جدار سجن الودع ... رد النما

ياهلترى  ... لو تهت عن ضيك وقلت أرجع جديد

هيردني الحلم البعيد .... يا هلترى

ولا اللما

أجمل ما فيكي إن الحياة

ميت ألف شكل ... ودين وحيد

يمسك ف ديل العمر  ... ننده مبتداه

يرسم جبيننا إللى إتندى ... بطرحه  بطرحه الجديد

نرجع عيال متشوقين نكبر معاه

نلقاه تملي قبلنا ... شئ مش بعيد

ياهلترى ... لسه ضفايرك فوق كتافك معقودين

ولا إنت بعتي  وإشترى  ... يا هلترى

زمن الحديد

أجمل مافيكي إن السماح

إسمك ورسمك  حتى لما بتتركيه

يقسم بشايره كل يوم مليون صباح

ألمح ملامحه ف كل درب تمري فيه

وأسأل  ... يقولوا إلحق بسره السر باح

هز الجناح وإسمح لنا ندور عليه

يا هلترى  ... لساكي فين ما بتخطري بتخضري

بور المشاعر ف الصباح ... طب والمسا يا هلترى

ها تخضريه

أجمل ما فيكي إن الربيع

طول السنة ساكن ملامح ضحكتك

وأنا كنت فاكر ف الخريف ممكن أضيع

إتشل خوفي وإنطلقت ف سكتك

يمكن عشان طول عمري كان سدي المنيع

-         معرفش ليه – ضوفي لتبهت بسمتك

ياهلترى ... لو بحت هيرد الصدى

ولا العبير هيكون ندا ...ياهلترى

من وردتك

أجمل ما فيكي إن الوفا  ..إللي إختفى

عاد لك ف أحضانه الغريب

طمعان ف حضنك توهبيه لحظة دفا

تتلقفيه  .. ومتقوليش  ... منين أجيب

يرجع قريب عن زمان لما إختفى

رجع المريض بعد الشفا ... هو الطبيب

ياهلترى لو قلتلك ها يبلغك

وإن بلغك راح تقبلي  ... يا هلترى

أبقى الحبيب

أجمل ما فيكي إن الوتر

خيط من مطر

مشدود على قلب السنين

وأنا إللى غاوي أعزف غناوي الطير  .. يتحنى القمر

من حنة السحر المرابط في العنيين

ترضع شراقي الحزن شربات إتعصر

من فاكهة العشق ف قلوب الطيبيين

ياهلترى  ... لحني القديم لساه سعيد

ولا البعاد سماه  وتاه ... ياهلترى

اللحن الحزين

أجمل ما فيكي إن النجوم

تقدر تدوم لو حتى شقشق صبحها

تشبه عيون متكحلين شقوا الغيوم

زاحوا الهموم عن طلة زفت طرحها

يا بختها  ... يا فرحي لما أصبح وأقوم

وألقاني بغزل ضلها من فرحها

يا هلترى  .... النجم مخلوق زيها أو منها

والفرح يقدر عالبكا .... يا هلترى

يوم جرحها

كان

كان

كان

محمد عبد الرحمن حجازي

شهيد جريح

إهداء : إلي روح والدي البطل عبد الرحمن حجازي

شهيد جريح

قبل الكلام ما نفسره

والمعنى يبقى صريح

الأبجدية إتعرفت

ع النطق بالتلميح

وأنا أبويا كان حل السؤال  ... إللي الوطن

لملم حروفه من نقوش سورة المحن

-         مين يابدن بعد الممات يقدر يعيش ؟ -

مدد حدوده ع الحدود

دمه إلتقى عضم الجدود

والدود ودود ما يكلش كرباج اليهود

صابه البارود .....

بس البارود خلاه يعيش

شهيد جريح

وأما الملايكة شدته

زاح عن كتافه شدته

والكهرمان أبو زهوته  ... من فرحته

طار فوق شواشي الريح

***

إستنى يابا  إبنك جنين

لساه بيتهجى الوطن يبدأ منين

من جوة قلبك

ولا من ضلع السنين

علمته يتحدى الحروف ويكون بشر

علمته يرسم بالقمر

ع الأرض حلم المحرومين

لسايا فاكر كلمتك

أمك وأختك والشقيق

خليك رقيق  ... وإبقى إفتكر

تقرالي من سورة  ياسين

***

إستنى يابا أما العيال يستوعبوا

معنى المطر والطين وضليلة الخضار

توت الوطن موجوع وصفصافه إنكسار

يااااااااادي النهار  .....

مين فينا كان في الإحتضار  !!

صدقتي يامه  إن البطل ده عاش شهيد

ولما مات  .. الصبر طبطب ع الوريد

شد الوتر ....

النبض كان دقات دفوف

مكانش خوف ...

أول خبر  .. سنه إبتسم

واللحن من فوق المآذن يا بشر

راجل كريم

شاركوا الملايكة ف زفته

م الأرض لرحاب الكريم

الله كريم ...

والأرض بتحب الجدور الطيبة

بتلم خيرها وتطلقه عند السحاب

ينزل عرق فوق الخطاوي المجهدة بعد إغتراب

يشتد عودها وتتحدف

على أصلها تحت التراب

ياااادي الغياب  ....

يادي الغياب  .. لو صح بتحن لبيوت الطيبين

علم بيبانهم يفضلوا

وسط الخلايق مفتحوين

والشمس مش متفصلة

على قد حد المقصلة

علشان تحش الموجوعين

دي الشمس أول يا بشر

ما بنقرا فاتحة  ... تقول آمين

***

إستنى يابا وصيتك

بتقوللي  حب المخلوقين

خلي الخلايق دنيتك

لو حتى مختلفين

من غير قضية يا ولد

هتروح لفين ولمين ؟

أقوله يابا الوقت ضيق

يقوللي أهلك والصديق

والتوتة والمحرات  سند

خليك وتد ...

زينة البلد  هو إللى مخلوق

لجل بكرة يموت شهيد

خليك بعيد عن يأس عشاق الطريق إللى إبتدى

يغرق بناسنا إللي إتنسوا يوم ما نسوا

إن الندى  فوق السنابل حر

الدنيا حر إتنسموا روح الوطن

وإتضللوا بحضن الجريد

خلوا الشراقي تحبكم

سرسوب محبة ع التراب

يطرح حياتكم ع الشجر

يابني  الحياة من غير تمن

والموت يكلفكم كتير

خليك في جنب إللى العمار بيهمهم

تفضل كبير

الله مايرضاش بالألم

نون والقلم ... وإللى إستلفته بيبقى دين

والشمس مش متفصلة

على قد حد المقصلة

عشان تحش الموجوعين

دي الشمس أول يابشر

مابنقرا فاتحة  ... تقول آمين

·       * *

إستنى يابا أما الصحاب يتجمعوا

العشرة هتجيبهم  أوام

معقولة تمشي وهم لسة ما ودعوا

بالنظرة ويوضوا السلام

يتصففوا  ويدمعوا

ويصلوا بعدك

زى ما تكون الإمام

أنا مش بنام ....

لسايا خايف مسمعكش

إن قلت يا محمد بكام

دعوة أبوك ساعة رضا

بالأرض يابا وبالسما

وبعمري  لو حتى إنقضى

إزاى تنادي ومسمعكش

إندهلي بالليل والنهار

أنا عبد همسك بإختيار

من يوم ما قلت إن الشجر

لو ضل فرعه بيبقى نار

والحكمة يابا  من لسانك سلسبيل

وإبن السبيل .. تفرش له زادك والسبيل

أسأل دا مين ....

تقول غريب   والدنيا غربة

ورد سائل يبقى عيب

والرزق نية  .... بس ربك يستجيب

إحلف لي يابني  يبقى رزقك من حلال

لو كسرة حاف  والأرض نومة

والسما تبقى اللحاف

وخاف لجوفك تحرقه لقمة شيطان

شد الرحال م المحرقة

الرزق مش ع المشنقة

دي الأرض أرضه وف السما

أرزاق عبيده معلمة

والشمس مش متفصلة

على قد حد المقصلة

عشان تحش المجروحين

دي الأرض أول يا بشر

ما بنقرا فاتحة  ... تقول آمين

محمد عبد الرحمن حجازي

رحمك الله يا أبي وصديقي ومعلمي  وجزاك عني وعن أمي وأخوتي  وكل من بسطت لهم   سبل العطاء والمودة

حدوتة من بر مصر

حدوتة من بر مصر

كتير يا حلوة غنولك

وياما الناي

لسانه قال على قولك

مسيره الجاي

يجيكي الحنة فى أكمامه

وسايق بكره قدامه

وبستناه ...

وبستناه وميت فكرة

مداها فجر يوم بكرة

يا طول صبري.. يا طول سهري

جلاليب الفرح دابت

ولا فرحناش

فدادين الفرج خابت

محصلناش

يا قوت الصبر يا قوتك

ولا القمح إللي ف سكوتك

لسانه إتحاش

لمين عاش

يا دوب للسهرانين جنبك

صواني المر والحنضل

ودور شاي

وآهة بين ضلوع الناي

***

يا مين قدي ولون خدي

حماره بوية م الدكاكين

مفيش أسرار وهتعدي

رقابنا ولو على السكين

عصاري الهم تعصرني

يا دمك ياللي تنصرني

وأبات مستقوي على نفسي

بحجة إني م السالكين

دروب بيلوص ف سكتها

كتير واعيين

وأعيش ف الدور منا الفارس

وقاعد ع الحصان مجعوص

وأفوق ألقى حصاني داب

وسيفي الحر سيف من بوص

محرمش !؟

مينفعش إني أطاطي لما تعوي الريح !؟

مينفعش إني أبقى جريح !؟

ف شرع الناي يصح الموت يكون تفاريح

هجيلك ....

هجيلك يوم ما قنديلك لسانه يبوح

وأغنيلك وجوايا شراقي جروح

بتتمنى  .. وتتملى

ف طرح ضلوعي بالغلة

فطير الذل يا حلوة حلاوته مرار

غنايا إزاي بيخنقني

صبح جوايا مش مني

قالتلي السر يا إبني

عشان وإنتم بعيد عني

نسيتم إنكم أحرار

كتير يا حلوة غنولك

وياما الناي

لسانه قال على قولك

مسيره الجاي

يجيكي الحنة ف أكمامه

وسايق بكرة قدامه

وبستناه

وبستناه

وبستناه

                محمد عبد الرحمن حجازي

شجر البارود

شجر البارود

شجر البارود موجود

لكنه زرع غريب

زرعة وجع بتجود

ساعة العقول ما تغيب

يحلف علينا الوقت

بالجودة و والموجود

نشرب كبابي الهم

زيف بالألم معقود

نجري عليه ونهتم

يرعى ضمينا الدود

وعشان قميص الدم

منطقش بإسم الديب

شجر البارود بقى عود

وإتشق شجر الطيب

* * *

يا أمايا  وإكمني وليدك

نبت وريدك

أدى إيدي ضميها ف إيدك

جاي لك في عيدهم وف عيدك

نروي الزيتون .. تحته شهيدك

يطرح بشاير م الجنة

عصرت قلبي إللي إتحنى

يوم نصرتك صلى وغني

وعبر عشان كان بيريدك

كان قولي يا أمه فى مواويلك

المبتدى شيب مستني

يطوي الخطاوي إللي ف سني

وكأني مكتوبلي أغني

على جسر قضاي

مديت لبكرة إللى هجرني

خيط م الوجع غصب عني

علمني صوتك ف سكوتك

أبكي ف غناي

ضميني

ضميني .. دفيني يا طاهرة

وقوليلي إزاي

حملتي القهر يا صابرة

قوليلي إزاي

منيش نساي لكن نفسي

تقوليلي إزاي

ضربتي البحر يا طاهرة

بمجداف ناي

منيش نساي لكن نفسي

تقوليلي إزاي

سكرت بنشوة النصرة وأنا ما شربت

غير دور شاي

صحيح

صحيح صوت البارود عالي

لكن صوت الوطن أعلى

صحيح تمن البارود غالي

لكن تمن السكوت أغلى

ودول ما تعودوش إنك

يبات دمعك على خدك

ماهم منك ... وأنا منهم

وقولي حتة من قولهم

صحيح صوت البارود عالي

لكن صوت الشهيد أعلى

                                                    محمد عبد الرحمن حجازي

مكتوب لخط البسملة

مكتوب  لخط البسملة

مشوار ف قلب المهمومين

بشوارع الحلم القديمة

على ناصية الناي إللي بطل ينجلي

من يوم ما جوف الأرض حوصل بذرته

نبت بوااااااار .... فرعه على

وإتمدد الليل القوي على كل حتة فى البيوت

يا أي صوت 

صحي الغلابة للعشا

والضل من تحت البوار

الشوب شاويه

محتارة فيه المغربية

تدوس عليه ولا تخاويه

ولا تناديله م السما نقطة ندى

تحيي النسيم من حسرته

وإن حاصرته لحظة أمل  .. تقدر تدوم ؟

ولا الهدوم  

ضاقت وقصرت ع العيال

يابسملة

إكسيني حلم يضمني

محمد عبد الرحمن حجازي

دايرة

دايرة !

ملعون أبو ولاد الدايرة

أصبح شعار إبن الدايرة

بعد الثريد والذي منه

والبوس كمان غصب عنه

نال المراد ثم كإنه

بقى نقطة على خط الدايرة

                                                         .. .. ..

ملعون أبو إللى مايستنى

حضرة جنابه ويتمنى

خمس سنين على برادعنا

ماتدوب ويرجع مرجوعنا

وجنابه يرجع يراجعنا

زي الحريم ... وأهو يتهنى

.. .. ..

وكلام في سرك يا أخينا

يابو عقل من أوسخ طينة

البيه جناب إللى أنينا

في زريبة من صنع إيدينا

حالف بدقنه ليهدينا

بديول لكافة أهالينا

.. .. ..

مين قال هنروي بدمانا

الأرض لو كات عطشانة

ماهو قول جناب إبن الفالحة

ودي كلمة حلوة مهيش جارحة

قسما براس ( يني ) الصالحة

لرويها بالويسكس معانا

.. .. ..

برسيم يا بيه ولا  ( جراوة )

كل  لما تشبع بهداوة

إخصى عليك ياللي ركوبك

خلاك ماتسواش مركوبك

ولا حتى فتلة ف ديل توبك

ماهو جهل معجون بغباوة

.. .. ..

ببريزة أصل من السكة

واتوصى بكلاب السكة

خلي البجاحة توضينا

وتصلي وقيفي علينا

وأهو متر ذل يكفينا

والأصل يركن ع الدكة

.. .. ..

يابلدنا ليه رضيت  تطاطي

ولبست توب لونه بناتي

عيب ع العمم لما الدية

تبقة السكوت يا أفندية

قسما بأيامنا الجاية

لتدوقوا من فعل الواطي

.. .. ..

يا أونطة من ماركة تفرج

م الجد نفسي ف مستخرج

يجلي الوشوش الممسوحة

لجل القناية المجروحة

إمتى الوشوش المفضوحة

يا بلدنا ( غرب ) هتتخرج

محمد عبد الرحمن  حجازي

إبن الدايرة  = إبن الدايرة

برادعنا = ما يوضع تحت الراكب على ظهر الحمار

الثريد = فتة ولكنها ليست بالخل والثوم وإنما بنكهة ( الأحزاب )

( يني ) =  شخصية ساقي  الخمر في الأفلام المصرية  بتاع ( بخبك يا خبيبي  )

( جراوة ) = أعواد الذرة الصغيرة  التي تزرع خصيصا لإطعام المواشي

( غرب )  = نحن ندفن موتانا في قرية تسمى اللشت  موقعها غرب قريتنا